भडगावमध्ये बनावट कीटकनाशकांचे रॅकेट उद्ध्वस्त; ४.९५ लाखांचा मुद्देमाल जप्त
महाराष्ट्र9 न्युज नेटवर्क भडगाव (जळगाव):
जिल्ह्यातील भडगाव येथे कृषी विभागाने धडक कारवाई करत बनावट आणि विनापरवाना कीटकनाशकांची अवैध वाहतूक करणाऱ्या रॅकेटचा पर्दाफाश केला आहे. या कारवाईत एका महिंद्रा पिकअपसह सुमारे ४ लाख ९५ हजार ४१७ रुपयांचा मुद्देमाल जप्त करण्यात आला असून, संबंधित संशयितांविरोधात गुन्हा दाखल करण्यात आला आहे.
’डमी ग्राहक’ बनून रचला सापळा
मिळालेल्या गुप्त माहितीनुसार, जळगावचे जिल्हा गुणवत्ता नियंत्रण निरीक्षक विकास बोरसे यांच्या मार्गदर्शनाखाली ही कारवाई करण्यात आली. ९ जून रोजी पेठ चौफुली येथे नाशिक विभागाचे अधिकारी कल्याण पाटील यांनी स्वतः ‘डमी ग्राहक’ बनून संशयिताला कीटकनाशकांची ऑर्डर दिली. संशयित माल घेऊन येत असतानाच, कृषी अधिकारी दिगंबर तांबे आणि भरत मोरे यांच्या पथकाने महिंद्रा पिकअप (क्र. MH15EG4034) अडवून ही कारवाई केली.
कायदेशीर कागदपत्रांचा अभाव
गाडीचा चालक अरुण गंगाधर निकम (रा. नायडोंगरी, ता. नांदगाव) याच्याकडे चौकशी केली असता, त्याने हा माल नाशिक येथील ‘निखिल ॲग्रो एजन्सी’मधून आणल्याचे सांगितले. मात्र, मालाची पक्की बिले किंवा अधिकृत विक्रीचा परवाना सादर करण्यात त्याला अपयश आले. मालाचा दर्जा संशयास्पद वाटल्याने कृषी विभागाने तत्काळ संपूर्ण साठा जप्त केला.
जप्त केलेल्या मालाचा तपशील:
क्लोरोपायरीफॉस १०% GR: ७०० किलो
सल्फर ८५% DP: १०० किलो
बोरिक ॲसिड: ४८ किलो
सेलफॉस व उंदीर मारण्याचे औषध: २ किलो
एकूण किंमत: ४,९५,४१७ रुपये (३ लाखांचे वाहन व १,९५,४१७ रुपयांची कीटकनाशके)
दोन जणांवर गुन्हे दाखल
या प्रकरणी कृषी अधिकारी दिगंबर तांबे यांच्या फिर्यादीवरून ‘निखिल ॲग्रो एजन्सी’चे प्रोप्रायटर रामचंद्र विठ्ठल निकम आणि चालक अरुण गंगाधर निकम यांच्या विरोधात कीटकनाशक कायदा १९६८, नियम १९७१ आणि भारतीय न्याय संहिता २०२३ च्या विविध कलमांन्वये गुन्हा दाखल करण्यात आला आहे. जप्त केलेल्या मालाचे नमुने पुढील तपासणीसाठी ठाणे येथील प्रयोगशाळेत पाठवण्यात आले आहेत.
ही कारवाई कृषी विभागाच्या वरिष्ठ अधिकाऱ्यांच्या मार्गदर्शनात करण्यात आली असून, यामुळे शेतकरी वर्गाची फसवणूक करणाऱ्या टोळीला मोठा चाप बसला आहे.
मुख्य संपादक : सचिन जयस्वाल
