चोपडा: बालकामगारांकडून काम करून घेणाऱ्या हॉटेल मालकावर चोपडा शहर पोलीस ठाण्यात गुन्हा दाखल..
महाराष्ट्र9न्युज नेटवर्क चोपडा:
शहरातील मेणबत्ती चौक परिसरातील ‘न्यू बापू टी हाऊस’मध्ये बालकामगारांकडून काम करून घेणाऱ्या मालकावर चोपडा शहर पोलीस स्टेशनमध्ये गुन्हा दाखल करण्यात आला आहे. राहुल भगवान महाजन (वय ३८, रा. अशोकनगर, चोपडा) असे गुन्हा दाखल झालेल्या हॉटेल मालकाचे नाव आहे.
नेमकी घटना काय?
मिळालेल्या माहितीनुसार, राहुल महाजन याने स्वतःच्या आर्थिक फायद्यासाठी १७ आणि १५ वर्षे वयोगटातील दोन अल्पवयीन मुलांना कामावर ठेवले होते. या मुलांना कामाचा योग्य मोबदला न देता त्यांच्याकडून कष्टाची कामे करून घेतली जात होती. विशेष म्हणजे, या मुलांना राहण्याची, जेवणाची आणि सुरक्षेची कोणतीही सुविधा पुरवण्यात आली नव्हती. तसेच, त्यांना गॅसवर दूध गरम करणे, साय काढणे, चहा बनवणे आणि ग्राहकांना चहा देण्यासारखी कामे करायला लावली जात होती.
पोलीस कारवाई
या बालकांना सकाळी लवकर बोलावून नियमापेक्षा जास्त वेळ काम करून घेतले जात होते. मुलांच्या कामाबाबत कोणतेही हजेरीपत्रक किंवा पगारपत्रक ठेवले नव्हते, तसेच त्यांना कोणताही विमा संरक्षणही दिले नव्हते. या मुलांचे शोषण होत असल्याची माहिती मिळताच, पोलिसांनी कारवाई करत दोन्ही अल्पवयीन मुलांची सुटका केली आणि त्यांना त्यांच्या नातेवाईकांच्या ताब्यात दिले आहे.
याप्रकरणी भारतीय न्याय संहिता कलम १४६, बाल कामगार अधिनियम कलम ३ आणि बाल न्याय (काळजी व संरक्षण) अधिनियम २०१५ च्या कलम ७९ अन्वये गुन्हा दाखल करण्यात आला आहे. पुढील तपास पोलीस उपनिरीक्षक युवराज वाळुंज करत आहेत.
मुख्य संपादक : सचिन जयस्वाल
