अडावद येथील महाराजस्व समाधान शिबिरात तक्रारींचा पाऊस; आमदारांच्या उपस्थितीत जागेवरच निपटारा, ७२३ लाभार्थ्यांना लाभ..
महाराष्ट्र9न्युज नेटवर्क अडावद (ता. चोपडा)
राज्य शासनाच्या ‘छत्रपती शिवाजी महाराज महाराजस्व समाधान शिबीर अभियाना’अंतर्गत अडावद (ता. चोपडा) येथे आयोजित सर्वसमावेशक शासकीय सेवा शिबिराला नागरिकांचा उदंड प्रतिसाद मिळाला. या शिबिरात तब्बल २००० ते २३०० नागरिकांनी उपस्थिती दर्शवली, तर ७२३ लाभार्थ्यांना विविध शासकीय योजनांचा थेट लाभ देण्यात आला. चोपडा तालुक्याचे आमदार प्रा. चंद्रकांत सोनवणे यांच्या हस्ते या शिबिराचे उद्घाटन संपन्न झाले. यावेळी रेशन आणि घरकुल योजनेबाबत आलेल्या अनेक तक्रारींचा आमदारांनी अधिकाऱ्यांमार्फत जागेवरच निपटारा केल्याने नागरिकांनी समाधान व्यक्त केले.
अडावद येथील क्षत्रिय माळी समाज मंगल कार्यालयात अडावद मंडळातील ९ गावांसाठी या एकत्रित महसूल व शासकीय सेवा शिबिराचे आयोजन करण्यात आले होते.
आमदारांचे ढोल-ताशांच्या गजरात स्वागत
सकाळी दहा वाजता आमदार प्रा. चंद्रकांत सोनवणे यांचे आगमन होताच शामराव येसो महाजन शाळेच्या विद्यार्थ्यांच्या लेझीम पथकाने आणि ढोल-ताशांच्या गजरात त्यांचे जंगी स्वागत केले. प्रारंभी छत्रपती शिवाजी महाराज, महात्मा ज्योतीराव फुले, डॉ. बाबासाहेब आंबेडकर, छत्रपती शाहू महाराज यांच्या प्रतिमांना पुष्पहार अर्पण करून कार्यक्रमाची सुरुवात करण्यात आली.
तक्रारींचा जागेवरच निपटारा
या शिबिरात नागरिकांनी सर्वाधिक तक्रारी घरकुल, पुरवठा (रेशन) आणि संजय गांधी निराधार योजना यांसंदर्भात मांडल्या. आमदार प्रा. सोनवणे यांनी या तक्रारींची गांभीर्याने दखल घेत संबंधित अधिकाऱ्यांना समक्ष बोलावून अनेक प्रश्नांची जागेवरच सोडवणूक केली. अनेक महिन्यांपासून प्रलंबित असलेली कामे मार्गी लागल्याने लाभार्थ्यांनी आमदारांचे आभार मानले.
विविध शासकीय योजनांचा थेट लाभ
शिबिरामध्ये एकाच छताखाली शासनाच्या विविध विभागांनी सेवा उपलब्ध करून दिल्या. यावेळी खालील महत्त्वपूर्ण वाटप करण्यात आले.महिला बचत गट, कर्जमाफी, आणि शेतकरी आत्महत्याग्रस्त कुटुंबांना आर्थिक मदतीचे धनादेश,आयुष्यमान भारत कार्ड, अपंग व निराधार योजनांच्या प्रमाणपत्रांचे वाटप,कृषी विभागांतर्गत दोन ट्रॅक्टर आणि एक गहू काढणी यंत्राचे (हार्वेस्टर) लाभार्थ्यांना वाटप.
आरोग्य आणि इतर विभागांचा सहभाग
शिबिरात महसूल, कृषी, आरोग्य, भूमिअभिलेख, वन, पशुसंवर्धन, परिवहन, सिंचन, महिला व बालविकास, घरकुल, रोजगार हमी आणि शिक्षण यांसह सर्व तालुकास्तरीय विभागांचे स्टॉल लावण्यात आले होते. आमदारांनी सर्व स्टॉल्सना प्रत्यक्ष भेट देऊन कामकाजाचा आढावा घेतला आणि आवश्यक सुधारणा करण्याच्या सूचना दिल्या. याच वेळी आरोग्य विभागातर्फे रक्तदान शिबिराचेही यशस्वी आयोजन करण्यात आले होते.
मान्यवरांची उपस्थिती
या शिबिराला प्रशासकीय अधिकारी आणि लोकप्रतिनिधींची मोठी उपस्थिती होती. यामध्ये प्रामुख्याने अमळनेरचे उपविभागीय अधिकारी मयूर भंगाळे, तहसीलदार भाऊसाहेब थोरात, गटविकास अधिकारी अंजली गर्गे, चोपडा शहरचे पोलीस निरीक्षक पवन देसले, अडावदचे सपोनि प्रशांत कंडारे, फौजदार सचिन नागरे, नायब तहसीलदार योगेश पाटील, तालुका कृषी अधिकारी रामचंद्र पाटील यांच्यासह सरपंच बबनखा तडवी, वडगाव बु.चे माजी सरपंच नामदेव पाटील, विकासो संचालक लोकेश काबरा, प्रकाश महाजन, प्रभाकर महाजन, दुध डेअरीचे माजी चेअरमन संजय पाटील, माजी पंचायत समिती सभापती ताहेरखा मण्यार, ग्रा.पं. सदस्य रियाजअली सैय्यद आदी मान्यवर उपस्थित होते.
कार्यक्रमाची सांगता मान्यवरांच्या हस्ते वृक्षारोपण करून करण्यात आली. ग्रामीण भागातील नागरिकांना त्यांच्याच गावात प्रशासकीय सुविधा सुलभतेने मिळाल्यामुळे या उपक्रमाचे सर्वत्र कौतुक होत आहे.
मुख्य संपादक : सचिन जयस्वाल
