चोपडा तालुक्यात सिटीस्कॅनची अपुरी सुविधा
रुग्णांचे होत आहेत अतोनात हाल
सिटीस्कॅनसाठी आता द्यावे लागणार फक्त दोन हजार रुपये
चोपडा प्रतिनिधी :—
चोपडा तालुक्यात कोरोनाने अक्षरशः थैमान घातला असून दररोज सुमारे 300 नव्या रुग्णांची भर पडत आहे व सद्यस्थितीत दोन हजार रुग्ण ऍक्टिव्ह आहेत अशा परिस्थितीत चोपडा तालुक्यात रुग्णांना सिटीस्कॅनची सुविधा मिळणे दुरापास्त झाले आहे . सिटीस्कॅन करण्यासाठी तब्बल तीन ते चार दिवस वेटिंग करावी लागत आहे तसेच चोपडा तालुक्यातील कोरोनाची वाढती संख्या पाहता तालुक्यात फक्त 3 सिटीस्कॅन केंद्र असल्याची माहिती मिळत आहे , त्यात समर्थ सिटीस्कॅन , नृसिंह हॉस्पिटल व हरताळकर हॉस्पिटल या तीनच ठिकाणी ही सुविधा उपलब्ध असल्याने रुग्णांची मोठी गैरसोय होत आहे .अजून सिटीस्कॅन केंद्रे असावीत अशी मागणी होत आहे .
सध्या चोपडा तालुक्याची कोरोनाची स्थिती अतिशय बिकट स्वरूपाची असून देखील सदर सेंटर सकाळी उशिरा सुरू होतात व संध्याकाळी लवकर बंद होतात अशा स्वरूपाच्या तक्रारी वाढत आहेत तरी पूर्णवेळ सेवा द्यावी व रुग्णांना वेठीस धरू नये अशी मागणी होत आहे .
शासकीय दरापेक्षा अव्वाच्या सव्वा रक्कम घेत असल्याच्या तक्रारी देखील वाढत आहेत . या बाबतीत प्रांताधिकारी सुमित शिंदे , तालुक्याचे तहसीलदार अनिल गावीत , मुख्याधिकारी अविनाश गांगोडे , नायब तहसिलदार राजेश पउळ , नायब तहसिलदार महेश साळुंखे यांच्या उपस्थितीत व पत्रकारांच्या बैठकीत यापुढे चोपडा तालुक्यातील जनतेने सिटीस्कॅन साठी फक्त दोन हजार रुपये द्यावेत व रेमडीसीवर साठी रुपये1200 द्यावेत असे ठरले असून जर कोणी हॉस्पिटल , मेडिकल स्टोअर्स किंवा डॉक्टर्स अधिकची रक्कम मागणी करत असेल तर तक्रार द्यावी आम्ही सदर व्यक्ती किंवा आस्थापनावर कायदेशीर गुन्हा नोंदवू असे प्रांताधिकारी सुमित शिंदे व तहसीलदार अनिल गावीत यांनी उपस्थित पत्रकारांशी बोलताना सांगितले . कोविडच्या नावाखाली सर्वसामान्य रुग्णांची लूट जर होत असेल तर सदर बाब चुकीचे असल्याचे सांगितले . अशा रुग्णालयांवर प्रशासनाच्या वतीने कारवाई करण्यात येईल असेही सांगितले , विशेष म्हणजे आरोग्य मंत्री राजेश टोपे यांनी सार्वजनिकरित्या जाहीर केल्यावर खाजगी रुग्णालये हे रुग्णांकडून एक ते तीन लाखापर्यंतची ऍडव्हान्स रक्कम मागतात व हे पैसे जमा करू शकतं नसणाऱ्या रुग्णांना बेड उपलब्ध होत नाहीत , परिणामी रुग्णाला आपला जीव गमवावा लागतो अश्या ऍडव्हान्स रक्कम मागणाऱ्या रुग्णालयांवर कठोर कारवाईची मागणी होत आहे .
तालुका आरोग्य अधिकारी डॉ प्रदीप लासुरकर मागील वर्षांपासून सातत्याने नियमित कोविड 19 ची दररोजची आकडेवारी न चुकता पत्रकारांना देत होते , पण दि 23 मार्च रोजी त्यांनी कोविडची आकडेवारी दिली नाही त्या संदर्भात तहसीलदार अनिल गावीत यांना विचारले असता , आर्टिपीसीआर ची राहिलेली आकडेवारी एकदाच आल्याने थोड्या अडचणी आल्यामुळे काल कोविडची आकडेवारी आम्ही देऊ शकलो नाहीत तरी आज पासून रेग्युलर मिळेल असे सांगितले …
मुख्य संपादक : सचिन जयस्वाल
