नक्षलवाद्यांकडून ड्रोनचा वापर; गोळ्या घालण्याचे आदेश
नवी दिल्ली: नक्षलवाद्यांच्या हाती ड्रोन लागले असून त्याची केंद्र सरकारने गंभीर दखल घेतली आहे. नक्षलवाद्यांकडे पुन्हा ड्रोन दिसताक्षणी गोळ्या घालण्याचे आदेशच केंद्राने सुरक्षा दलाला दिले आहेत. संरक्षण आणि गुप्तचर यंत्रणांच्या शिखर संस्थेने हे आदेश दिले आहेत.
काही दिवसांपूर्वी छत्तीसगडच्या बस्तरमधील सुकमा जिल्ह्यात सीआरपीएफ शिबिरादरम्यान ड्रोन फिरताना दिसलं. हे मानवरहित यान नक्षलवाद्यांकडून ऑपरेट केलं गेल्याचं उघड झाल्यानंतर हे आदेश दिले आहेत. गेल्या महिन्यात तीन दिवस किस्ताराम आणि पालोडीमध्ये सीआरपीएफ शिबिराजवळ लाल आणि पांढरा उजेड निघणारे हे ड्रोन फिरताना दिसले. या ड्रोनच्या आवाजाने त्याकडे सुरक्षा दलाचं लक्ष गेलं. त्यानंतर जवान सतर्कही झाले होते. नक्षलवादी मोठा घातपात घडवून आणण्याची शक्यता असल्याने सर्व जवानांना सतर्कतेचे आदेश देण्यात आले होते. या घटनेनंतर संरक्षण यंत्रणांनी या प्रकरणाची चौकशी सुरू केली आहे. घिरट्या घालणाऱ्या ड्रोन्समधून लाल आणि पांढरा प्रकाश बाहेर पडत असल्याचे दिसले तसेच ड्रोन्सचा गुणगुणणारा आवाजही ऐकू आला. त्यानंतर त्या कँपसह जवळच्या अन्य कँपवर सावधानतेचा इशारा देण्यात आला. गुप्तचर विभागाने केलेल्या तपासातून मुंबईतील एका विक्रेत्याने काही संशयित माओवाद्यांना ड्रोनची विक्री केल्याचा संशय आहे. याबाबत आणखी चौकशी सुरू आहे. ज्या दोन कँपवर हे ड्रोन व मानवविरहित विमाने घिरट्या घालताना आढळली ते दोन्ही कँप अत्यंत संवेदनशील असून दुर्गम भागात दाट जंगलात आहेत. त्यांच्याशी संपर्क साधणे तुलनेने कठीण आहे. या परिसरात माओवाद्यांचा वावर असतो. ओडिशा, महाराष्ट्र आणि आंध्रप्रदेश या राज्यांच्या सीमा या ठिकाणी जोडल्या जात असल्याने ही घटना अत्यंत चिंता जनक आहे .
मुख्य संपादक : सचिन जयस्वाल
